Digitaliseringa i skolen engasjerer mange, og vi ser at foreldre har ulike og til dels motstridande synspunkt. FUG si oppgåve er å synleggjere utfordringar og moglegheiter ved den digitale skolekvardagen for styresmaktene – med utgangspunkt i breidda av foreldra sine ulike meiningar.
Det er kommunane i samarbeid med skolane som har ansvaret for å velje digitale løysingar og følgje opp den digitale skulekvardagen til elevane. Opplæringslova § 1-3 seier at opplæringa skal skje i samarbeid og forståing med heimen, og at ho skal ha opne dører mot verda og framtida. Kommunane og skolane har difor plikt til å sørgje for at foreldra får vere med på å planleggje, gjennomføre og vurdere verksemda til skolen (§ 10-4).
Når elevane får tilgang til digitale einingar via skolen, kan dette gje gode moglegheiter for danning, fagleg opplæring og sosial utvikling. Samstundes kan det også føre til utfordringar, både på skolen og heime. Digitalisering i skolen inneber vanskelege avvegingar mellom elevane sin rett til deltaking, opplæring og ytringsfridom på den eine sida – og individet sin rett til vern på den andre.
Her kan du sjå kven som sitt i Foreldreutvalet for grunnopplæringa
FUG meiner at:
- Vi som foreldre bør vere like påkopla og nysgjerrige på barnas digitale liv og kvardag som vi er på barnas «analoge» liv.
- Gratisprinsippet må gjelde og skal etterlevast, også i saker som handlar om tilgang til og erstatningsansvar ved skade på digitale einingar. Det betyr at det ikkje skal vere noko anna grunnlag for erstatningsansvar ved skade på digitale einingar enn det er for skade på bygg og fysiske installasjonar på skolen.
- Skolen skal førebu elevane på framtida, der teknologiske ferdigheiter er essensielle. Digitalisering i skolen gjev også fleire moglegheiter for tilpassa opplæring.
- Opplæring i, og refleksjon rundt, informasjonssikkerheit og digital dømmekraft må få større plass i lærarutdanninga, i profesjonsfellesskapet i skolen, i elevane si opplæring og i skole-heim-samarbeidet.
- Digitale verktøy og appar gjev elevane verdifulle moglegheiter for visuell og auditiv støtte. For FUG er det viktig at kravet om universell utforming vert følgt for å sikre inkludering av alle elevar, uavhengig av funksjonsevne.
- Foreldreutvalet oppmodar til ein god balanse mellom digitale og trykte læremiddel i undervisinga. Hovudfokuset bør liggje på formålstenleg bruk og på elevane sitt læringsutbyte.
- Aktive grep frå skoleeigar reduserer faren for at elevane vert eksponerte for reklame og anna skadeleg innhald. Kontroll på skolen sine kommunikasjonsplattformer vil hindre at desse vert arenaer for mobbing, ekskludering og utanforskap. Ei moglegheit for foreldrekontroll på skolen sine digitale einingar kan bidra til færre konfliktar rundt skjermbruk på fritida.
- God og tilpassa informasjon om, og involvering i, avgjerder knytt til skolen sine val av digitale einingar, plattformer og læremiddel, bidreg til eit godt skole-heim-samarbeid. Ved å involvere foreldra og skolemiljøet, kan skulen også få nyttige innspel om utfordringar og moglegheiter ved bruk av digitale løysingar.
- Skolen må sørgje for at foreldre får eigen tilgang til digitale einingar og læringsplattformer, slik at vi som foreldre betre kan ivareta vår rett og plikt til å delta aktivt i barnas opplæring.
- Skolen bør sikre at foreldre får opplæring i bruk av skolen sine digitale løysingar og ressursar, slik at dei kan vere gode støttespelarar for barna sine i det daglege skulearbeidet og ha god kommunikasjon med lærarane.
- Ikkje alle skuleeigarar og skolar har tilgang til kunnskap og ressursar for å sikre god innføring og trygg bruk av digitale ressursar. FUG ønskjer difor at det vert etablert ei nasjonal støtteeining for å bidra til at dei digitale løysingane i opplæringa er tilfredsstillande.
- Det bør utarbeidast ein nasjonal tenestekatalog for å kvalitetssikre digitale ressursar til skolen. Ein nasjonal tenestekatalog vil vere eit viktig bidrag til trygg og sikker bruk av digitale ressursar.
- Skolane bør følgje rettleiingar og råd frå Utdanningsdirektoratet når det gjeld personvern og informasjonssikkerheit. FUG vil særleg framheve desse:
- Korleis beskytte elevar mot skadeleg innhald på nett
- Råd for god digital praksis og skjermbruk i skulen
