Billegare barnehage: – Heilt feilslått ressursbruk

Fungerande utvalsleiar i Foreldreutvalet for barnehagar, Sahra Jaber, meiner at budsjettforliket som gir billegare barnehage er feilslått ressursbruk.

I dag vart det kjent at budsjettforliket mellom SV, Sp og Ap fører til ein redusert månadspris i barnehagar på 800 kroner.

– Det er inga tvil om at 800 kroner i månaden er kjærkomne pengar for ein barnefamilie, men FUB meiner likevel at dette er heilt feil bruk av ressursar. Alle pengar som går til barnehage, må brukast på å løyse bemanningskrisa og heve kvaliteten på barnehagetilbodet. Det som skjer no er heilt feilslått ressursbruk, seier Sahra Jaber.

Ønskjer kvalitetsløft

Ho understrekar at ho er glad for at barnefamiliar no får meir å rutte med, men meiner at det allereie finst mange gode moderasjonsordningar for familiar med låg inntekt.

– Billegare barnehagar har diverre ingenting å seie for kvaliteten på barnehagetilbodet. FUB blir jamleg kontakta av fortvilte foreldre som opplever at barnehagen stenger tidlegare på grunn av låg bemanning. Det vil ikkje bli færre slike saker med mindre vi aukar tilgangen på assistentar, fagarbeidarar og pedagogar, seier FUB-leiaren, og peikar på krisa i Tromsø, der meir enn 50 barn framleis ikkje har fått plass i barnehagen til hausten.

Tilsette i barnehagesektoren har i årevis bede om tiltak som betrar bemanninga. Stadig fleire seier opp jobben på grunn av høgt arbeidspress.

– Dette føyer seg inn i rekkja av feilslåtte tiltak, og vi fryktar at endå fleire tilsette vil sjå mørkt på framtida.

200 millionar til fleire ansatte

I budsjettforliket er det eit lite lysglimt. 200 millionar som skal gå til ekstra tilsette i barnehagane gjennom øyremerkte pengar.

– Den gode nyheita er at pengane denne gongen er øyremerkte. Den ikkje fullt så gode nyheita er at 200 millionar totalt ikkje rekk til meir enn nokre vikartimar når det er fordelt.

Les kva FUB meiner om dei lave søkertala til barnehageutdanninga